Tveir reynsluboltar í Kölku, þeir Hörður Már Karlsson og Albert Einvarðsson, tóku skóflustungu að nýju flokkunar- og geymsluhúsi sem rísa mun á athafnasvæði fyrirtækisins á næstu vikum. Nýja byggingin, 1440 fermetrar að stærð, verður móttaka fyrir rekstrarúrgang annan en þann sem ætlaður er til brennslu. Þá mun húsið einnig nýtast sem geymsla. Með þessari bragarbót á aðstöðunni verður hægt að vanda meira til flokkunar á endurvinnsluefnum og auka þannig verðmæti þeirra. Í núverandi aðstöðu hefur verið erfitt um vik að flokka sundur mismunandi málma, svo dæmi sé tekið. Verðmætari málmar hafa því oftar en ekki farið til kaupanda sem blandaðir brotamálmar. Tækifæri til að bjargað verðmætum endurvinnsluefnum liggja einnig í fleiri flokkum úrgangs m.a. plasti og pappa.
Þegar nýja húsið verður komið í notkun verður núverandi móttaka eingöngu nýtt til móttöku og vinnslu á brennsluefnum. Með nýjum búnaði verður hægt að nýta meira af úrgangi sem fellur til hér á svæðinu en hefur verið fluttur burt til urðunar eða annarrar meðhöndlunar. Með því munu flutningar á úrgangi frá Suðurnesjum dragast umtalsvert saman í samræmi við þá áherslu að meðhöndla úrgang sem næst upprunastað.
Upphaflega stóð til að ráðst í byggingarframkvæmdir í vor en nokkrar tafir hafa orðið af ófyrirsjáanlegum orsökum. Nú er áhersla lögð á að verkið, sem stýrt er af Verkfræðistofu Suðurnesja fyrir hönd Kölku, vinnist hratt og að húsið verði komið í notkun síðla hausts.
