Pétur Gísli Jónsson, forstöðumaður sorphirðu hjá Terra umhverfisþjónustu, segir Reykjanesbæ vera til fyrirmyndar þegar kemur að frágangi á ílátum fyrir úrgang. Þetta kom fram á ráðstefnu Fenúr, fagráðs um endurnýtingu úrgangs, sem haldin var í Reykjavík 5. júní sl. Pétur fjallaði um vinnuaðstæður fólks sem vinnur við sorphirðu. Fram kom í máli hans að víða séu aðstæður mjög erfiðar og úrbóta því víða þörf. Sagði hann úrbætur sem gerðar hafa verið í Reykjanesbæ vera öðrum til eftirbreytni. Þó á einstaka stað megi enn lagfæra aðstöðuna sé hún víðast hvar orðin til fyrirmyndar í bænum. Aðspurður svaraði Davor Lucic, rekstrarstjóri hjá Kölku, því til að lykillinn að þessum framförum sé gott samstarf aðila, sveitarfélagsins, húsfélaga og fasteignafélaga auk Kölku. Hann hafi mætt á ófáa húsfélagsfundi til að fara yfir þessi mál með íbúum en tölvupóstar skili litlu. Hann segir sveitarfélagið sinna þessu af áhuga og þegar allir sem hlut eiga að máli geri sitt þá náist góður árangur.
